الحب والجمال

موضوع: الحب والجمال الإثنين سبتمبر 01, 2008 8:26 am

بما ان الله جميل ، فاننا كلنا بنحبه ، ومن هنا كان ارتباط الحب بالجمال .. وبما ان هناك بنات كتير حلوين وزي العسل .. واخرين يتمسكون بجمال الروح ، فتعالوا بينا نتكلم عن الجمال بعيدا عن اراء الجمهور ، يعني الجمال زي ما ربنا خلقه وهو ثلاثة دروب :
الاول جمال مادي: وهو جمال المراه والرجال ايضا ، وجمال الالوان والسماء والارض والطبيعه والعصافير والكناريا وخلافه ، وهذا النوع من الجمال هو ابسط انواع الجمال واقلها قيمه ، وطبعا ده مش تقليل من الجمال المادي اللي كلنا بنموت في دبديبه ، فنحن نجد في القران ذلك مثل قوله تعالي ( ولكم فيها جمال حين تريحون وحين تسرحون ) ...ولكن هي دي الحقيقه صدقوني .. ويلا بقي نخش علي النوع التاني:
وهو جمال الافعال : فربما نجد امرأه جميله ولكن فعلها ليس بجميل ، لذلك نري تقييم ملكة جمال العالم لايقتصر فقط علي الملامح ولكن علي التصرفات ( جمال الحركة - جمال البسمه - جمال الكلمه - جمال الايماء - جمال التصرفات ) طبعا انا مش عاوز اختزل الافعال علي ده وبس مثل جمال ملكات العالم ،،لكن انا بقول الافعال بشكل عام ،، يعني يا سلام بقي لو بنت جميله ويكون فعلها جميل ،،،واجمل مثل علي كده هو مثال( الطلاق ) في القران : وانا اسف لذكر هذه الكلمه (الوحشه) ولكن بجد هو ده المثال المعبر ،، لان احنا عارفين ان الطلاق شيء رديء جدا .. ولكن انظر بقي للجمال ( اقصد الناس الحلوين )هيتصرفوا ازاي؟؟؟ ( اذا طلقتم النساء فسرحوهن سراحا جميلا ) يعني مش زي ما كلنا عارفين من تصرفات رديئه مثل الخناق والغضب والمشاكل في الطلاق.. لكن الحلوين بقي ميعملوش زي ماحنا بنشوف في الافلام ، ولكن طلاق بمنتهي (الجنتله ) كله حب وجمال وعفو وصفح .. ويلا يا عسل مع السلامه والقلب داعيلك وهديلك كل حقوقك وعليها بوسه ... هو ده جمال الافعال......طب فيه احسن من كده ؟؟؟؟؟؟؟؟؟؟ اه فيه الجمال الثالث .. يلا ندوقه:
هو جمال اسمي لانه من غير فعل هو موجود برضه : وده نعرفه ازاي.. بصراحه هو ده اللي بيقولوا عليه الجواز زي البطيخه يا تكون حمرا يا تكون قرعه ( بيضاء ) طب ايه هو بقي ؟ هو هو اللي بندور عنه جمال الصفات جمال الاخلاق جمال القيم والمباديء اللي بيحملها شكل جميل جمال مادي وجمال فعلي واجمل مثال علي كده هو سيدنا يوسف ( اللي هو جميل من كله ) حيث يقول ابوه يعقوب: عليه السلام في القران ( فصبر جميل والله المستعان علي ماتصفون ) اخواني .. اذا وجدتم امراه فيها انواع الجمال الثلاثه فطلقوا الدنيا بمن فيها وتزوجوها .. لكن ادي دقني اهه لو لقيتوها