أنا لا أكذب بل أتجمل

قصة فيلم لاحسان عبد القدوس .. بطولة أثار الحكيم وأحمد زكي.. لكن انا باستعير الاسم بس.. اصلي كتبت عن الجمال وقلت انه 3 انواع او درجات وهما الجمال المادى والعملي والخلقي :وبعدين تخيلت ان بعض الناس ممكن يحاول ان يتخلق بيهم في حين ان الحقيقه غير كده ..وانه غير جميل ولا حاجه وان كل اللي بيقوله مجرد زواق .. وهو في نفس الوقت لا يكذب ولكن يتجمل.. فايه اللي حصل بالضبط

1 - الجمال المادي : ممكن الفتاه تذهب لبيوت التجميل وهات يا الوان وهات يااكسسوار ومحزق وملزق يهوس .. وبعدين يشوف الزبون البنيه فيعجب بيها ويدفع الشيء الفلاني اخونا المتعلق في حبال الهو الدايبه .. وفي الاخر تلاقي نفسك يا بو زيت ما غزيت .. وطبعا مش المفروض ان الانسان لما يعمل صفقه مثلا انه ينضحك عليه ..ماهو لو انضحك عليه هيرجع ف كلامه، وهيقلب الدنيا تدريجيا زي ما انضحك عليه تدريجيا.. وربما يقلب التربيزه علي كل اللعيبه ويقول حقي برقبتي .. طيب وبعدين ايه اللي هيحصل.. هيدور علي صفقه تانيه متكونش بتكدب وبتتجمل ويحدث ملا يحمد عقباه

2- جمال الافعال : ده بقي هيقلب بغم اكتر.. لانه الافعال عامله زي الجوهره الاصليه متبانش الا بمرور الوقت وبمرور الوقت هيكتشف عمله ( الردي ) وان اختياره للجمال علي اساس العمل الحسن كان زواق برضه ومكتشفش ده الا بعد خراب مالطه ، لان حبيبته خريجه معهد التمثيل بدرجة امينه رزق مع مرتبة عبد الوارث عسر الاولي وهيقول تعاليلي يامه

3- جمال الاخلاق : الله عليه الله عليه.. يا سلام سلم الاخلاق بتتكلم .. اه لو فزت بواحده من النوع ده .. واه لوفزتي بواحد من النوع ده.. دا جمال عامل زي جوهره بس مش موجوده في الدنيا اصلا ..بمعني ان هذا النوع من الجمال بيزيد بالاستعمال ولا يقل يعني كل يوم اجمل من اللي قبله .. وده بيفكرني بالحور العين ..لان الدين بيقول : ان الحبيبه في الدنيا هتكون في الاخره اجمل من الحور العين (طبعا لو انطبق عليها هذا النوع من الجمال )
فاذا شبهنا الجمال السابق علي انه (لا للسيئات) فان الجمال ده معناه (نعم للحسنات )_ واحنا عارفين ان ربنا مش عاوز مننا الا الاتنين دول ، منعملش سيئات ونعمل حسنات ، انا بقرب الصوره بس مش بلعبكها_ بس عموما هي موجوده في مجال عملي ( العمارة يعني ) فهناك بعض انواع الحجر بنستخدمه للواجهات ، النوع ده بيزداد جمالا كل ما يقدم(يصبح قديم ) فالاكسده ( وهي تماثل الحياه العمليه للارتباط بين اتنين روشين وعسل) تؤثر في الحجر وتزيده جمالا يوم بعد يوم .. وعمر صاحب البيت ما يفكر يغير زواق الواجهه الجميل.. ويا سواد ايامك وظلام ليلك بقي ..لو كان النوع ده من الجمال زواق ايضا.. لانك هتكون عطشان ومستني الميه وبعدين تلاقي سراب ..وشويه صغيره وتلاقي ثعبان جايلك من الصحرا ..هتقول علي طول يا فكيك